أحمد الخطيب

من علّمنا أن الميزة التنافسية تعني تخفيض الأسعار؟ من أوهمنا أن التميّز يعني أن تكون أرخص؟

هذا المقال مو عن السعر… بل عن الفكرة. عن الشيء اللي يخلي العميل يختارك… حتى لو غيرك أقرب، وأسرع، وأرخص.

كثير من الناس يظن إن الميزة التنافسية هي هوية حلوة، تغليف جميل، شوية هدايا مع كل طلب، أو منتج رخيص. لكن الحقيقة؟ الميزة التنافسية هي الشيء اللي يخلي السوق يقول: "هذا مختلف، هذا صعب يُقلَّد".

أنا شفت براندات صغيرة كسرت السوق… مو لأنهم أقوى، بل لأنهم عرفوا يضيفون شيء ما أحد قدر يجيبه.

خذ محمصة "مارد القهوة". ما قالوا إن قهوتنا الأحسن، ولا إنهم الأرخص… قالوا بكل ثقة: "إذا ما عجبتك القهوة، رجّعها، وناخذها ونرجعلك فلوسك… بشرط ما تكون استخدمت أكثر من ٦٠ جرام".

مين يقدر ينافسهم على هالجرأة؟ قليل. وهنا صارت الميزة: ضمان… يبني ثقة.

وخذ كالو. شركة وجبات صحية قلبت السوق. ما نافست على السعر… نافست على القيمة. خيارات أكثر بـ ٣ أضعاف، خدمة مرتبة، هوية قوية وبارزة، تجربة عميل ولا غلطة، ولوجستيات تخلّي كل شيء يجيك كأنه مصمَّم لك.

الناس ما تشترك عندهم لأنهم "أرخص". الناس تشترك وتتكلم عنهم لأنهم حسّوا بشيء ما حسوه من قبل.

المنافسة الحقيقية ما هي صياح. المنافسة الصادقة؟ هدوء تام، وشغل دقيق، وصبر طويل.

الدرس باختصار: الميزة التنافسية ما تُشترى. تُصنع… وتُصقل. وبدال ما تنافس بسعرك، نافس بتجربتك. وإذا ما قدرت تنافس بحجمك، نافس بفكرتك. لأن اللي يفوز في النهاية؟ مو الأكبر… بل الأكثر تميز.