كيف تتمركز في قطاع الخدمات المتكاملة؟
من قال أن التخصص يعني التضييق؟ ومن أوهمنا أن التنوع يجب أن يكون عشوائي؟
١٧ محرم ١٤٤٧ هـ
•
التسويق
من قال أن التخصص يعني التضييق؟ ومن أوهمنا أن التنوع يجب أن يكون عشوائي؟
هذا المقال مو عن كثرة الخدمات… بل عن دقتها. عن كيف تبني لنفسك مكان ما ينافسك فيه إلا القليل.
فيه شركات تقدم كل شيء، لكل أحد… لكن تطلع من كل شيء بلا شيء. وفيه شركات تعرف بالضبط هي وين، ولمين، وليه.
التمركز مو بس جملة تكتب وخلاص... هو قرار استراتيجي يُنفذ… هو هوية تبنى ويُعمل بها.
خلني أبسّطها وأعطيك المختصر، التمركز عبارة عن نوعين: (التمركز الأفقي - التمركز العامودي)
التمركز الأفقي يعني تقدم خدمة واحدة، لقطاعات متعددة. مثل شركة تكتب محتوى لكل الصناعات. أما التمركز العامودي؟ فهو تقدم خدمات متعددة، لقطاع واحد. مثل وكالة تسويقية تخدم بس قطاع الأغذية والمشروبات.
السوق صار ذكي. العميل يبي أحد يفهمه ويتكلم بنفس لغته ومصطلحاته، ويحس بألمه بدون ما يتكلم كثير، مو بس يقدّم له كل شيء.
بالنسبة لي أنا أفضل التمركز العامودي. تخيل تشتغل مع نفس القطاع لسنين… بتصير تعرف مشاكلهم أكثر منهم. وهنا… يجيك التميّز.
لكن التمركز الأفقي؟ يحتاج جهد، ويشتتك أكثر ويخليك جيد بأشياء كثيرة، لكن ما راح تكون عظيم بأي شيء، وعشان تعالج هالمشكلة تحتاج جهد وموارد وشراكات ضخمة.
خذ بعض المجموعات مثل فوج ووهج. كل مجموعة فيها شركات تقدم خدمات مختلفة، بس كل وحدة مختصة بجزئية (تمركز أفقي). تحالفات مرنة، تغطي السوق بدون ما تتشتت.
وإذا بتسأل: طيب وش فايدة التمركز فعلًا؟ أقول لك: يعطيك قدرة ترفع سعرك بثقة، لأنك فاهم، لأنك متمكن.
ويعطيك هوية ما تتكرر. ويخليك تقول: "هذا أنا، وهذا مجالي، أنا فاهمك وحاس فيك وأقدر أعالج مشاكلك بسهولة".
أبسط مثال على التمركز: لو كنت - لا سمح الله - تعاني من مشكلة صحية في العيون، بتروح لطبيب عام وتدفعله ١٠٠ ريال وتدخل عنده ؟ ولا بتروح لاستشاري عيون وتدفعله ١٠٠٠ ريال وتدخل عنده ؟ أكيد الاستشاري.
طيب بتروح لمستشفى عادي ولا مستشفى العيون التخصصي ؟
الدرس باختصار: التمركز ما يحدك… يحرّرك. يخليك تشتغل بتركيز، وتبني براند بعمق. وإذا كنت تعرف مين تخدم… السوق هو اللي يجيك.